Gris është një nga lojërat më të reja që ka ardhur në Steam dhe mund të themi se është një vepër tradicionale arti. Teksturat dhe efektet që do të shihni në të nuk janë ato që mund të jeni mësuar në lojërat tipike të viteve të fundit, por është pikërisht thjeshtësia ajo që i jep bukurinë Gris.
Loja është krijuar në stilin e një vizatimi të dekoruar me bojëra uji. Ju do të luani si e ashtëquajtura Gris, një vajzë në botën e saj të ëndrrave të cilës papritur i ikën zëri. Puna juaj është të udhëtoni përmes lojës për ta gjetur. Teksa rrisni progresin tuaj në lojë do të fitoni aftësi që do ju ndihmojnë të ecni përpara dhe çdo fazë që do të plotësoni në udhëtimin tuaj, do ju shtojë një ton ngjyre të ri rreth jush.
Nuk është fort sfiduese si lojë. Ka disa pazlla të lehta përgjatë rrugëtimit për t’u dhënë disa momente qetësie ku edhe mund të vlerësoni pamjen rreth e qark jush. Kompozimi i dizajnit të veçantë dhe fantastik, së bashku me notat e këndshme muzikore janë ato elementë që e bëjnë lojën vërtet intriguese.
Gris është loja e parë nga zhvilluesit Nomada Studio në Barcelonë dhe u lançua në Steam më 13 dhjetor. Ndiqni trailerin e saj më poshtë.