Google përgatit prezantimin e konsolës së tij të parë

Konsola duket se do të përdoret për Project Stream/Yeti

Google pritet të prezantojë planet e tij të plota për shërbimin streaming për lojëra në cloud në 19 mars, gjatë Game Developers Conference 2019, që do të mbahet në San Francisco, Kaliforni. Ftesat janë dërguar dhe mesa duket kanë dalë dhe disa imazhe.

Teknologjia është testuar fillmisht publikisht në bashkëpunim me Ubisoft nëpërmjet Project Stream. Disa mijëra pjesëmarrës në SHBA patën mundësinë të luanin Assassin’s Creed Odyssey menjëherë nëpërmjet Google Chrome në Windows, Mac, Linux dhe Chrome OS, dhe e vetmja kërkesë ishte internet me shpejtësi prej 25 megabit/sekondë. Në mbledhjen e fundit, Google zbuloi se rezultatet e testit ishin “super pozitive“.

Sipas disa burimeve, duket se shërbimi i streaming do të lançohet nga Google së bashku me një konsolë gjatë GDC 2019. Burimet thonë se konsola që do të hidhet në treg për të mbështetur këtë projekt është ende duke u testuar dhe mesa duket përfshin chat brenda lojës.

Microsoft gjitahshtu do të japë më shumë informacion mbi shërbimin e tyre, Project xCloud gjatë GDC 2019. Një seancë e veçantë pritet të zhvillohet të enjten, në 21 mars pikërisht për të.