Së shpejti pritet të konfirmohet dhe data e lançimit të lojës
Së shpejti pritet të konfirmohet dhe data e lançimit të lojës
Më herët këtë vit, Adam Isgreen, drejtor kreativ i serisë Age of Empires, tha se Age of Empires 4 do të zbulohej gjatë këtij viti, me shumë mundësi në Gamescom që po zhvillohet këtë javë, ose gjatë XO19 që zhvillohet nga Microsoft në nëntor. Tashmë, menaxheri i përgjithshë i Xbox, Aaron Greenberg, konfirmon se loja do të zbulohet në XO.
Gjatë një interviste, Greenberg tha se kishte një lajm mjaft interesant për të thënë. Ai zbuloi datën se kur do të mund të shohim më në fund gameplay nga Age of Empires 4 – në 14 nëntor. Ky lajm padyshim që i gëzoi fansat e lojës historike RTS. Data e zbulimit është e njëjtë me datën e lançimit të Age of Empires 2: Definitive Edition në Windows Store, Steam dhe Xbox Game Pass në PC. Pra, kjo ditë është shumë e madhe për çdo lojtar të serive Age.
Kemi gjithashtu dhe një trailer të parë për episodin e katërt të kësaj serie, por ai nuk na jep shumë detaje për lojën. Nëpërmjet këtij trailer, na jepet një ide e atmosferës së lojës me anë të muzikës, concept art si dhe një zëri që thotë: “Së bashku kemi luftuar përgjatë historisë. Tashmë, një epokë e re ka ardhur.”
Megjithatë, trailer-i gjithashtu na jep mundësinë të shohim disa prej kombeve nga periudha të ndryshme historike që do të jenë pjesë në lojë. Shikojmë ushtarë britanikë, samurai japonezë, luftëtarë nga Roma antike, Indianë të Amerikës, pushtues spanjollë dhe shumë më shumë, por ende asgjë nuk është konfirmuar.
Ende nuk ka një datë zyrtare lançimi për Age of Empires 4, por duke parë se gameplay i lojës do të zbulohet gjatë XO19, pritet që një datë e saktë ose të paktën e përafërt të vijë po gjatë asaj periudhe. Shpresojmë që loja të vijë brenda vitit 2020, pasi do të ishte vërtet një lajm që do të gëzonte fansat e lojërave strategjke.