FBI i ka kërkuar Sony që të japë informacione rreth një përdoruesi të PS4, që mendohet të ketë përdorur shërbimin online të konsolës për të shpërndarë drogë me vlerë mijëra dollarë, si pjesë e një rrjeti të shpërndarjes së kokainës.
Sipas raportimeve, FBI ka urdhëruar kompaninë elektronike që të japë informacion rreth një përdoruesi të quajtur Curtis ‘Dola’ Alexander, se cilat lojëra ka luajtur ai në PS4. Urdhërat gjithashtu i kërkojnë Sony të japë detajet mbi të gjitha progreset e tij në lojërat e konsolës, adresën fizike të personit, adresën e IP dhe numrat e telefonit që ka në account-in e tij të PlayStation.
FBI është lejuar ta bëjë këtë kërkesë në bazë të provave që mendohet të kenë se “Speedola20,” siç njihej Alexander online, ka përdorur PSN për të koordinuar shitjen e më shumë se $34,000 kokainë.
Aplikacioni gjithashtu zbulon se një person ka konfirmuar që Alexander i ka kontaktuar gjatë një loje dhe ka caktuar një vend takimi, ku më tej i ka shitur një qese me rreth 100 gr kokainë për $4,400.
E gjitha kjo është kryer përmes sistemit të mesazheve të PlayStation, që i lejon përdoruesit të flasin përmes konsolës. Gjithashtu sugjerohet se Alexander dhe personi në fjalë e kanë realizuar bisedën në audio chat rooms të PS4.
“Hetuesit mendojnë se Alexander ka besuar se po të komunikonte përmes lojërave online do të ishte i sigurtë.” Ka detajuar FBI në mandatin e saj. “Rrjedhimisht Alexander besonte se mund të përdorte audion gjatë gameplay-it për të organizuar detajet e shkëmbimit të tij.”
Ende nuk dihet nëse Alexander është arrestuar, por nëse FBI ka marrë informacionet e tij personale përmes PlayStation Network, gjasat janë që kanë për ta gjetur brenda një kohe të shkurtër.