Epic thotë se do të stepet nga lojërat ekskluzive nëse Steam ofron të njejtën ndarje fitimesh me të

Sipas tij Tim Sweeney, edhe mund ti çojnë të gjitha lojërat e Epic aty.

CEO i Epic Games, Tim Sweeney është shprehur se kompania nuk do të mbajë më kontrata ekskuziviteti, nëse Valve, kompania pas Steam, ofron të njejtat ndarje të fitimeve me zhvilluesit si ajo.

Tim iu referua ndarjes 70/30 të Steam si “problemi numër 1 për zhvilluesit dhe prodhuesit e lojërave PC”. Ishte pikërisht Twitter vendi ku ai shprehi mendimet e tij dhe hodhi propozimin që Epic të mos mbajë më lojëra ekskluzive në dyqanin e tij.

“Nëse Steam i qëndron raportit 88/12 të ndarjes së fitimeve me zhvilluesit, Epic do të tërhiqej nga lojërat ekskluzive dhe madje do të konsideronim ti sillnim vetë lojërat që kemi deri tani në Steam.”

“Një ndryshim i tillë do të ishte një moment i lavdishëm për PC gaming dhe do të kishte një impakt masiv për gjenerata të tëra. Në këtë mënyrë dyqanet mund të jenë sërish vende të këndshme ku mund të blesh gjëra, e jo Game Developer IRS”.

Epic Games Store u lançua në dhjetor. Kompania arriti të tërhiqte kaq shumë vëmendje pasi realisht ofronte një ndarje shumë më të mirë fitimesh krahasuar me Valve. Pak para se Epic të lançonte Epic Game Store, Valve bëri disa përjashtime në ndarjen e fitimeve, duke bërë kështu që në disa lojëra ndarja e fitimeve ti qëndronte raportit 75/25, që prapë në fakt nuk ia doli të barazohej me Epic.

Sidoqoftë një ndryshim dhe një konkurencë e tillë nga hiçi la pasojat e veta, duke shkaktuar shumë gamera të inatoseshin me taktikat e ekskluzivitetit, që Epic kishte përzgjedhur për të çarë përpara.

Ndonëse Epic ofron një ndarje shumë më të mirë të fitimeve, ende është mbrapa me disa nga tiparet që përdoruesit e Steam janë mësuar të kenë 15 vitet e fundit.