Nëse jeni fans i lojërave falas në PC, që kush nuk është, atëherë Epic Games Store është një emër shumë i dashur për ju. Kryesisht sepse po bëhen gati dy vite që dyqani jep lojëra falas çdo javë, nga të cilat asnjëra nuk ka qenë aq e madhe sa Grand Theft Auto V. Ky promocion kishte ndikim shumë të mirë edhe në shitjet e GTA 5. Take-Two thotë se kjo e ka ndihmuar GTA të arrijë numra edhe më të larta shitjesh.
GTA 5 shiti më shumë njësi gjatë tre mujorit të parë të vitit financiar të Take-Two, pra gjatë periudhës 1 prill-30 qershor, se çdo tre mujor tjetër që në lançimin e lojës. Gjashtë javët pasuese, përfshirë këtu giveaway-in e Epic Store gjithashtu kishin më shumë shitje të GTA 5 se çdo periudhë tjetër në vitet e mëparëshme. Take-Two thotë se promocioni me Epic ishte “faktor kontribues” në këtë sukses shitjesh.
Shitjet totale të GTA 5 tashmë kanë arritur 135 milionë, një rritje me 5 milionë nga 130 milionë që ishin në raportin e fundit financiar të Take-Two.
Në qershor u njoftua se GTA Online do të marrë edhe një lançim më vete, që do të jetë falas për tre muaj për lojtarët e PlayStation 5. Duket se lojtarët thjesht nuk mund të ngopen me GTA.