Epic Games është një kompani lojërash që shumë njerëz, jo për çudi, e urrejnë. Ka shumë lojtarë që nuk e preferojnë Epic Games Store, platformën e tyre të shitjeve online, për shkak të mungesës së tipareve dhe politikave të vështira që ka.
Shumë lojtarëve nuk ju pëlqen strategjia e tyre për të marrë sa më shumë lojëra ekskluzive që të jetë e mundur, në vend që të dëgjojnë interesat e lojtarëve dhe gjërat që ju duhen atyre. Tani duket se Epic Games Store ka filluar ti thotë jo lojërave si Skatebird nga Glass Bottom Games dhe po fokusohet vetëm në të marrin e lojërave ekskluzive.
Kritika më e fundit vjen nga Megan Fox në Twitter, dhe jo nuk është ajo Megan Fox që po mendoni ju. Megan është themeluesja e Glass Bottom Games, një zhvillues i pavarur lojërash. Loja më e fundit e tyre është Skatebird. Sipas një Tweet-i, Epic Games Store nuk e do lojën, sepse ajo është tashmë në Steam dhe atyre ju interesojnë vetëm lojërat ekskluzive.
Vetëm para pak ditësh themeluesi i Epic Games, Tim Sweeney shpjegoi arsyetimin e tij pas logjikës së lojërave ekskluzive. Ai beson se mënyra më efektive për të ndryshuar ndarjen 70/30 të fitimeve, është nëse sjell vetëm lojëra ekskluzive në Epic Games Store.
Si pasojë e përgjigjes së Epic, Megan vazhdoi deklaratat e saj duke thënë se Epic është si një “kopsht me mure që nuk lë këdo të hyjë brenda.” Sigurisht që shprehja origjinale ngjan më mirë në anglisht, por përkthimi është pjesë e punës tonë fundja.
Duket se strategjia e Epic për të marrë sa më shumë lojëra ekskluzive që të jetë e mundur do të vazhdojë, por është pak shqetësuese kur kompania thjesht ju thotë jo hapur lojërave, vetëm se nuk janë ekskluzive të tyret. E bën situatën të duket sikur ata duan të fillojnë monopolin e dytë brenda industrisë së gaming.
Gjithsesi para disa ditësh u zbulua se cross-play i lojtarëve të Borderlands do të jetë brenda platformave Epic dhe Steam, ndaj nuk ka shumë rëndësi se në cilin dyqan mund të zgjidhni ta blini.