CS:GO Danger Zone vjen me një hartë të re dhe shumë ndryshime

Ndër të tjera, vijnë disa sende fantastiko-shkencore dhe pings si në Apex Legends

Danger Zone në Counter-Strike: Global Offensive, mode-i i ngjashëm me një battle royale, ka marrë një update të madh. Në të vijnë një hartë e re, plot sende dhe përmirësime të ndryshme, dhe disa ndryshime që duket se vijnë nga Apex Legends. Ndër ‘to përshihen një sistem pings dhe respawn-e.

Ende nuk ka shumë detaje mbi sistemin e ping-eve, por pritet që të jetë i ngjashëm me sistemin e vlerësuar mjaft mirë të Apex Legends. Sistemi i respawn-eve premton që “për sa kohë ekipi yt mbijeton, do të kesh mundësi të ngjallesh kudo nëpër hartë“. Gjithashtu, do të kesh mundësinë të zgjedhësh disa perks që nga fillimi, nga “të preferuarat, si taser” në “lodra të reja, si çizmet exojump“.

Këto çizme ju lejojnë të vraponi më shpejt dhe të hidheni më lart, dhe janë vetëm një prej sendeve dhe përmirësimeve të reja. Të tjera ndryshime përfshijnë mina toke të cilat ju fluturojnë në ajër, një mburojë balistike, një dron me telekomandë dhe më shumë. Megjithatë, disa prej tyre duket se nuk do të vijnë në të njëjtën kohë si ky update, por do të bëhen pak më vonë pjesë e lojës.

Harta e re, Sirocco, duket se e ka marrë inspirimin në Afrikën e Veriut, duke patur një kështjellë të stilit maroken ndër tiparet e saj kryesore. Në Twitter dhe faqen zyrtare të Counter-Strike u shfaqën pamjet e para të hartës, ku mund të shihen ndërtesa të rrënuara, kodra me rërë si dhe një tub nafte i cili kalon në ujë për të arritur në atë çka duket si një rafineri nafte. Në faqe gjithashtu përmendet dhe një “rrjet i ndërlikuar kalimesh nëntokësore“.

Për më shumë informacion mbi Sirocco mund të vizitoni faqen zyrtare. Danger Zone u bë pjesë e lojës në dhjetor, kohë kur loja gjithashtu u bë falas.

A do t’a provoni këtë update të ri të CS:GO?