Kemi lajme të këqia për fansat e PlayStation që kishin në plan të shkonin në PAX East javën e ardhshme. Me përhapjen e Coronavirus që po bëhet një emergjencë gjithmonë e më e madhe, Sony ka vendosur të mos marrë pjesë në PAX, duke i anulluar planet e saj përgjatë eventit.
“Sot, Sony Interactive Entertainment mori vendimin që të anullonte pjesëmarrjen e tij në PAX East në Boston, për shkak të rritjes së shqetësimeve të lidhura me COVID-19” shkruante një update në PlayStation Blog. “Menduam se ky ishte opsioni më i sigurtë, duke parë se si po ndryshon situata dita ditës. Jemi të zhgënjyer që po anullojmë pjesëmarrjen tonë në këtë event, por shëndeti dhe siguria e forcës sonë punëtore është prioriteti ynë.”
Përtej pasojave që coronavirus po lë mbi njerëzit, duket gati e sigurtë në këtë pikë se epidemia do të lërë gjurmë edhe në tregun e infrastrukturës kineze, që është përgjegjëse për një pjesë të madhe të paisjeve elektronike të botës. Një numër i madh lojërash dhe produkteve të tjera gaming janë vonuar për shkak të mbylljes së fabrikave dhe sado që është ende herët për ta thënë me siguri, ka gjasa që kjo vonesë do të ndikojë edhe në lançimin e konsolave të gjeneratës së ardhshme. Mbetet që të shpresojmë për më të mirën.