Përhapja e virusit vazhdon të ndikojë edhe në industrinë e gaming.
Përhapja e virusit vazhdon të ndikojë edhe në industrinë e gaming.
Game Developers Conference 2020 do të mbahet në më pak se një muaj, por emra të mëdhenj të industrisë kanë njoftuar se nuk do të marrin më pjesë në të, për shkak të shqetësimeve të vazhdueshme nga coronavirus.
Anullimet më të mëdha deri më tani janë Sony dhe Facebook. “Nga shqetësimet që kemi për shëndetin dhe sigurinë e punëtorëve tanë, partnerëve dhe komunitetit të GDC, Facebook nuk do të marrë pjesë këtë vit në Game Developer Conference për shkak të risqeve publike të lidhura me COVID-19,” shkruajti Facebook në një deklaratë javën që lamë pas.
Deklarata e Sony ishte e ngjashme: “Me zhgënjim të madh duhet të anullojmë pjesëmarrjen tonë, por shëndeti dhe siguria e forcës tonë punëtore është shqetësimi ynë kryesor.”
Edhe EA tashmë ka ndjekur të njejtat hapa, duke thënë: “Duke e ndjekur me kujdes situatën globale me Coronavirus dhe me përshkallëzimin e fundëm të rasteve në rajone të reja, kemi vendosur të marrim masa shtesë për të mbrojtur mirëqenien e punëtorëve tanë, duke përfshirë këtu kufizimin e të gjithë udhëtimeve të panevojshme. Si rezultat do të anullojmë pjesëmarrjen tonë zyrtare në GDC dhe do të limitojmë prezencën në evente të tjera. Po vazhdojmë ta monitorojmë situatën nga afër.”
Hideo Kojima pastaj, që do të mbante një bashkëbisedim për Death Stranding, ka anulluar angazhimet e Kojima Productions në GDC.
Vetë GDC i ka adresuar shqetësimet për coronavirus në një deklaratë të postuar në 20 shkurt: “Besojmë se, bazuar edhe në ligjet e rrepta të US pë karantinën e coronavirus, jemi në gjendje të ekzekutojmë një event të sigurtë dhe të suksesshëm për komunitetin tonë.”
Që nga data 21 shkurt ka patur 15 raste të konfirmuara të COVID-19 në Kaliforni, me një total prej 53 rastesh totale të konfirmuara në Shtetet e Bashkuara. Sado që GDC ka pësuar anullime nga shumë të ftuar, PAX East gjithashtu ka patur të njejtin fat.
GDC 2020 do të zhvillohet në datat 16-20 mars.