Epic Games bëri një lëvizje të papritur dhe njoftoi se do të sillte në treg lojëra nga krijuesit e Control, Limbo dhe The Last Guardian. Specifikisht, kompania do të lançojë një multiplatformë publikimi, ku zhvilluesit do të mbajnë 100% të të drejtave të copyright dhe do të përfitojnë 50/50 në të ardhurat e lojës.
Epic gjithashtu thekson se do të mbulojë 100% të rrogave të zhvilluesve dhe të gjitha shpenzimet e lidhura me vendin e studios, marketingun dhe publikimin e projekteve.
Të treja skuadrat me të cilat po nis ky udhëtim i ri për Epic janë të dashura për komunitetin e gaming. Remedy së fundmi solli Control, të nominuar edhe për Game of The Year, Playdead ka sjellë Limbo dhe Inside dhe së fundmi GenDesign na ka dhënë Shadow of the Colossus, Ico dhe The Last Guardian.
Hector Sanchez nga Epic Games tha: “GenDesign, Remedy dhe Playdead janë tre nga studiot më inovative dhe të talentuara në idustri, me një vizion të fortë për lojërat e tyre të ardhshme. Ato do të kenë liri të plotë krijimi, ndërkohë që Epic do të mundësojë themele të forta për shërbimet që atyre ju nevojiten.”
Nuk ka më shumë detaje për këtë marrëveshje, por me shumë mundësi nga ana e PC, do të kemi të bëjmë me ekskluzivitetin në Epic Games Store.