microtransactions-albania
Lajm i Fundit

Ky është mendimi juaj mbi gaming dhe microtransactions

Këto janë rezultatet e pyetësorit tonë!

Çfarë është e përbashkëta midis Battle Pass-it të sezonit 8 të Fortnite, DLC-ve të GTA 5, FIFA Ultimate Coins dhe skinit të fundit të Zed në League of Legends? Fenomeni i microtransactions ka “pushtuar” industrinë e gaming vitet e fundit dhe ne kemi parë shëmbuj sa të mirë, aq edhe të këqinj të përdorimit të tyre. Siç ju njoftuam dhe pak ditë më parë, ne këtu në GameON vendosëm të bënim një studim mbi mënyrën se si ne, gamer-at shqiptarë, shpenzojmë paratë tona në videolojëra, e veçanërisht në microtransactions. Më poshtë do të gjeni çdo informacion. Jam i sigurt se një pjesë e tyre vërtet do t’ju habisin!

Cila është mosha mesatare e gamers në Shqipëri?

Në mënyrë të pritshme, gamer-i mesatar shqiptar është duke kaluar adoleshencën e tij. Megjithatë ajo çfarë na surprizon është numri i lojtarëve deri në 30 vjeç, të cilët me shumë mundësi janë rritur në një tjetër periudhë të gaming, ku lojërat vinin të plota e jo gjysmake *khëm*Anthem*khëm* e mbase ndihen deri diku edhe të çuditur e me siguri të shqetësuar për ndryshimet që kanë ndodhur kohët e fundit në mënyrën se si lojërat po lançohen këto ditë. Me shumë mundësi ata duan që situata të ndryshojë për mirë e ne s’mund të bëjmë gjë tjetër veçse të biem dakort.

Gjithashtu, është shumë interesant fakti se ka lojtarë mbi moshën 30 vjeç që morrën pjesë në këtë studim, edhe pse numri i tyre është fare i vogël. Do të ishte vërtet interesante të dëgjonim mendimet e tyre mbi industrinë e gaming sot.

Cilat janë platformat e preferuara të gamers shqiptarë?

Kjo mbase është surpriza e parë e këtij studimi. Për të qenë të sinqertë, prisnim që Playstation të ishte platforma mbizotëruese për gaming në Shqipëri. Megjithatë, duket se mbreti i platformave mbetet PC. Duke parë luftën që po bëhet kohët e fundit midis Epic Games dhe Steam, nuk kishim si të mos e përfshinim dhe atë pak në këtë studim. Siç duket, shqiptarët janë ende besnikë të platformës së Valve, por një numër i lartë i tyre është gjithashtu në Epic Store, meshumë mundësi prej Fortnite.

Nuk mbetet mbrapa as gamingmobile, i cili ndodhet fare pranë Playstation përsa i përket numrit të lojtarëve. Me shumë mundësi, kjo shifër vjen për shkak të suksesit të PUBG Mobile, i cili po merr vazhdimisht update të shumta. Ndërkohë, mbeten zhgënjyese rezultatet e Xbox One dhe Nintendo Switch. Megjithëse ky rezultat pritej deri diku për Switch, duket se shifrat konfirmojnë dështimin e Xbox One, sidomos në vendin tonë. Presim që Xbox-i i ardhshëm t’i sjellë një frymë të re platformës së Microsoft.

graph1
graph2

Si paguajnë shqiptarët për lojërat e tyre?

Fillimisht, ishim kuriozë të shihnim a punojnë lojtarët shqiptarë dhe rezultatet ishin sa të befasueshme, aq edhe të pritshme. Më shumë se gjysma e lojtarëve shqiptarë nuk kanë një punë. Edhe pse mund të duket e çuditshme, duke patur parasysh moshën e re të tyre kjo gjë ka kuptim. Megjithatë, duke parë këto shifra lind pyetja: në qoftë se ata nuk punojnë, kush paguan për lojërat e tyre? Në mënyrë të çuditshme, më shumë se gjysma e tyre janë përgjigjur se i paguajnë vetë çmimet për të ndjekur pasionin e tyre. Si arrijnë t’a bëjnë këtë? Mbase nuk do t’a zbulojmë kurrë. Ose mbase thjesht harrojnë që janë lekët e prindërve 😉

graph3
graph4

Si preferojnë shqiptarët t’i harxhojnë paratë e tyre?

Tani vjen ajo që mund të quhet pjesa më interesante e këtij studimi. Fillimisht, do të ishte interesante të zbulonim se për çfarë i harxhojnë ata paratë e tyre, DLC apo in-game currency si V-Bucks, G-Coins ose Riot Points, të cilat përdoren shpesh për blerjen e skins dhe cosmetics në lojë. Këtu fitoi qartë in-game currency, çka ka kuptim duke parë trendet e fundit dhe popullaritetin në rritje të lojërave multiplayer. Ky rezultat lë shumë vend për diskutim, pasi duhet thënë se votat për DLC janë vërtet të ulëta. Mbase ne nuk preferojmë të paguajmë për përmbajtje ekstra në një lojë, edhe pse shpesh herë, si në rastin e The Witcher 3 ose Skyrim ato vërtet ia vlejnë.

Shpenzimet e shpeshta nuk duken një problematikë e madhe në tregun shqiptar, ndryshe nga ai botëror ku ka lojtarë të shumtë të cilët shpenzojnë shuma marramendëse në microtransactions. Siç duket, shumica prej nesh shpenzojnë deri në disa herë në vit dhe shifrat ulen drastikisht kur vjen puna tek shpenzimet mujore dhe javore. Mund të supozojmë se shpenzimet në videolojëra janë “dhuratë” që shumica prej nesh ja bën vetvetes.

graph5
graph6

Në kohët e sotme, në industrinë e gaming, sado reviews të mirë të ketë një lojë, në fund të ditës janë shifrat ato që flasin. Një numër i madh lojtarësh shqiptarë duket se nuk kanë shpenzuar kurrë para në lojëra. Megjithatë surpriza e vërtetë është numri i lojtarëve që kanë shpenzuar mbi 500€ në lojëra. Ndërkohë që ne i inkurajojmë ata të ndjekin pasionin e tyre si gamers të apasionuar që jemi dhe vetë, këta lojtarë duhet të kenë vërtet kujdes, për shkak se bëhtet fjalë për shifra vërtet të mëdha. Gjithashtu, të shumtë janë dhe ata që shpenzojnë në dukje “rastësisht”, e këtu përfshihem dhe vetë unë.

graph7

Por, cilat janë lojërat ku ne i shpenzojmë këto para? Siç pritej, Fortnite është mbreti i kësaj kategorie, duke parë suksesin e lojës që prej lançimit të saj. Duket se ajo vërtet i ka mbërthyer gamers shqiptarë, duke iu rrëmbyer atyre nga xhepi shumat më të mëdha të parave. Në vend të dytë ndodhet CS:GO, lojë e cila edhe pse nuk ka transaksione të shumta brenda saj, ka një komunitet të tërë dedikuar tregtimit të skin-eve të armëve, rreth të cilave gjithashtu ishin ndërtuar dhe ruleta dhe vendosje bastesh. Disa prej këtyre skin-eve kushtojnë shuma marramendëse (Dragon Lore AWP është mbi $1000). Çfarë vihet re në përgjithësi është suksesi i battle royale-ve, duke parë dhe shifrat e arritura nga PUBG, ndërkohë që MOBA-t ende vazhdojnë të jenë në preferencat e lojtarëve shqiptarë, dhe pse shifrat kanë rënë dukshëm nga çka ishin vite më parë, kur ato ishin në pikun e tyre. A do të ndodhë e njëjta gjë me battle royale? Tani për tani, duket diçka e pamundur.

graph8
graph9

Si përfundim, do të donim të falenderonim përzemërsisht të gjithë pjesëmarrësit në këtë studim. Ata i kaluan vërtet pritshmëritë tona. Shpresojmë që t’ju kemi futur sadopak më thellë në industrinë dhe në mëndjet e gamers shqiptarë.

Do të donit të shihnit më shumë studime dhe artikuj të ngjashëm me këtë? Na jepni mendimin tuaj.