Që nga viti 2008, Apple ka krijuar një lloj lidhje të pazgjidhshme midis iPhone-ve dhe App Store-it. Fushata reklamuese e kompanisë “There’s an app for that” tërhoqi miliona njerëz, të cilët gjatë viteve kanë blerë më shumë se një miliard iPhone. Dhe meqenëse App Store ishte i vetmi vend për të marrë programe për iPhone, miliona zhvillues u dyndën gjithashtu te Apple.
Të hënën, Apple do të përballet me Epic në një gjykatë në Kaliforni për një çështje rreth përpunimit të pagesave dhe komisioneve. Apple kërkon që zhvilluesit e aplikacioneve të përdorin përpunimin e pagesës sa herë që shesin artikuj dixhitalë në aplikacion, si një pamje të re për një personazh Fortnite ose edhe për shumë artikuj të tjerë.
Prodhuesi i iPhone thotë se përdorimi i konfigurimit të pagesave garanton siguri dhe drejtësi, dhe duhet deri në 30% komision për ato shitje pjesërisht për të ndihmuar në drejtimin e App Store. Megjithatë Epic, thotë se politikat e Apple janë monopole dhe komisionet e saj shumë të larta.
Procesi gjyqësor lexohet si një luftë e korporatave rreth asaj se kush merr sa para kur të gjithë blejmë artikuj në aplikacione. Por rezultati i këtij rasti mund të ndryshojë gjithçka që dimë jo vetëm për App Store, por për mënyrën se si funksionojnë transaksionet mobile në platforma të tjera si Google Play store
Ajo që e bën këtë çështje të pazakontë, tha Olson, profesor i asociuar në Boston College Law School, është sfida sesi funksionojnë kompanitë moderne të teknologjisë. Apple shpall qasjen e saj “kopsht me mure”, ku është aprovuar çdo aplikacion që ofrohet për shitje në App Store-in e saj, si një tipar i pajisjeve të saj, duke premtuar që përdoruesit të mund të besojnë çdo aplikacion që shkarkojnë sepse është verifikuar.
Përveç akuzës për një tarifë deri në 30% për blerjet brenda aplikacioneve, Apple kërkon që zhvilluesit e aplikacioneve të ndjekin politikat kundër asaj që ajo e konsideron përmbajtje të pakëndshme, të tilla si pornografia, inkurajimi i përdorimit të drogës ose portretizimet realiste të vdekjes dhe dhunës.
Nga ana e saj, Epic ka argumentuar që kontrolli i rreptë i Apple nga App Store është antikonkurrues dhe se gjykata duhet ta detyrojë kompaninë të lejojë store-e alternative të aplikacioneve dhe procesorë pagese në telefonat e saj.
“Apple është më i madh, më i fuqishëm, më i ngulitur dhe më i dëmshëm se monopolet e dikurshme,” tha Epic në një paraqitje ligjore. “Madhësia dhe arritja e Apple tejkalon çdo monopol teknologjie në histori.”
Epic nuk është e vetmja kompani nëkëtë çështje. Spotify u ankua veçanërisht te rregullatorët e Bashkimit Evropian, duke thënë se komisioni prej 30% i Apple dhe rregullat e App Store shkelën ligjet e konkurrencës së BE. Të Premten, komisioneri i BE-së i konkurrencës tha se një hetim paraprak zbuloi se “konsumatorët humbnin” si rezultat i politikave të Apple.
Apple do të ketë një mundësi për t’iu përgjigjur kundërshtimeve të komisionit përpara një gjykimi përfundimtar për këtë çështje. Nëse humbet, Apple mund të goditet me një gjobë deri në 10% të të ardhurave të saj vjetore. Gjithashtu do t’i kërkohet të ndryshojë mënyrën e aplikimit të tarifave për shërbimet e transmetimit, të paktën brenda BE.
Apple po përballet gjithashtu me një vëzhgim në rritje në SHBA, ku ligjvënësit në prill zhvilluan një seancë dëgjimore me përfaqësues nga prodhuesi i iPhone dhe Google, si dhe nga Spotify, Match dhe Tile. Gjatë seancës dëgjimore, të dy Spotify dhe Tile argumentuan se lëvizjet e Apple ishin monopole.