Është thuajse fakt i kryer që një lojë e re e Batman është në zhvillim e sipër. WB Games Montreal ka hedhur shumë të dhëna rreth këtij projekti të ri, që për momentin nuk është zbuluar. Lojtarët janë mëse të emocionuar për ardhjen e një aventurë të re të Dark Knight.
Pikërisht, për këtë arsye, fansat e kanë dedikuar kohën e tyre në gjetjen e të dhënave për lojën hipotetike. Kemi nga ata që besojnë se kanë informacione të rëndësishme për të. Një leaker që më parë ka patur informacione të sakta për E3 2019, tashmë ka diçka të re për lojën e ardhshme të Batman.
Në adresën e tij në Twitter ai postoi një mesazh misterioz, ku tha se loja që të gjithë janë duke pritur do të quhet Batman: Arkham Legacy. Krahas kësaj ai shtoi se edhe shumë personazhe të tjera të universit të Batman do të mund të luhen. Pra loja mund të ketë superheronj të ndryshëm, secili me setin e tij unik të aftësive.
Ideja në përgjithësi duket interesante, por kini parasysh se për momentin është ende një thashethem. Është e rëndësishme të theksojmë se WB Games Montreal nuk ka konfirmuar asgjë për lojën, ndaj duhet të jemi pak të duruar derisa të vijë ai njoftimi zyrtar.
Një teaser që kompania publikoi, ju dha fansave të dhëna të shumta për lojën. Falë kësaj, mendohet se seria pasardhëse do të lidhet me Court of Owls, por prapëseprapë as ky fakt nuk është i konfirmuar. Për ditë me rradhë WB Games Montreal kanë publikuar të dhëna që na kanë bërë të mendojmë se një zbulim i ri rreth Batman është në rrugë e sipër.
Disa nga lojërat më të fundit të Batman që kemi parë në industrinë e videolojërave kanë qenë Batman: Arkham Origins që u lançua në 25 tetor për PlayStation 3, Xbox 360, Wii U dhe PC. Ndërkohë Batman: Arkham Knight u lançua në 23 qershor të 2015s për PlayStation 4, Xbox One dhe PC.