Avokati thotë se FIFA Ultimate Team përmban “logjikën e një kazinoje”

Për të qenë të sinqertë, ai e ka një farë të drejte

Janë ngritur dy padi kundër Electronic Arts për mode-in e lojës Ultimate Team (FUT) në ekskluzivitetin e FIFA, sipas gazetës franceze L’Équipe (sipas GFFN).

Dy avokatë parizienë, Karim Morand-Lahouazi dhe Victor Zagury, po argumentojnë se modaliteti i lojës është “një formë bixhozi… e integruar në këtë videolojë” dhe ata synojnë të tregojnë rreziqet e FUT.

FUT është një modalitet lojë online që është në ekskluzivitetin e FIFA që nga viti 2009. Ndërsa lojtarët kanë akses në monedha brenda në lojë, mënyra më e shpejtë për të blerë pakot e lojtarëve do të ishte përmes FIFA points që janë në dispozicion vetëm me para të vërteta.

Zagury tha se klienti i tij ka shpenzuar 660 dollarë në pesë muaj “pa marrë kurrë një lojtar të madh”, gjë që krijon një cikël shkatërrues dhe nevojën për të futur edhe më shumë para në lojë për të marrë pako.

Ai shtoi se “blerja e pakove nuk është gjë tjetër veçse një bast… logjika e një kazinoje që ka hyrë në shtëpitë e tyre” dhe që një fëmijë mund të luante lojën pa kufizime. Zagury tha gjithashtu se “Belgjika dhe Hollanda kanë marrë përsipër këtë çështje”, duke iu referuar përpjekjeve të vendeve për të goditur loot boxes, duke i etiketuar si lojëra fati ose përpjekje me motive të jashtëligjshme.

Ultimate Team përfaqëson një nga burimet më të mëdha të fitimit të EA. Afërsisht 28 përqind e të ardhurave neto të zhvilluesit konsistonin në transaksione UT në vitin 2019, duke arritur në rreth 716 milion dollarë “, “një pjesë e konsiderueshme e së cilës ishte marrë nga FIFA Ultimate Team”.