Do të mund të merrni iPhone-in e ri dhe shërbime të tjera të Apple duke paguar çdo muaj
Do të mund të merrni iPhone-in e ri dhe shërbime të tjera të Apple duke paguar çdo muaj
Shumë analistë besojnë se Apple do të krijojë një shërbim të bazuar tek abonimet për iPhone. Sipas tyre, një ndryshim i tillë dramatik në strategjinë e kompanisë mund të rriste shumë çmimin e kompanisë në bursë duke parë sigurinë që ofron ky model shërbimi.
Në këtë model, Apple mund të ofrojë një upgrade për iPhone së bashku me një katalog të tërë shërbimesh, duke variuar nga memorie në iCloud, në Apple TV+ etj. Kjo do të thotë se të abonuarit do të ishin të detyruar të përdornin ekosistemin e krijuar nga Apple dhe kompania do të merrte fitime të vazhdueshme vit pas viti. Gjithashtu, konsumatorëve do t’iu pëlqente ky opsion, pasi ata do të merrnin shërbimet e Apple së bashku me versionin e ri të iPhone duke paguar një kosto fikse mujore.
Gjatë një mbledhje të mërkurën, CEO i Apple Tim Cook nuk e hodhi poshtë idenë e një modeli abonimesh kur analisti Toni Sacconagi e pyeti mbi këtë çështje, madje duke thënë se kompania po punonte në diçka të ngjashme.
Apple ka kohë që ka hedhur bazat për këtë kalim. Në 2015, Apple filloi t’i lejonte përdoruesit të paguanin për iPhone-t e tyre në bazë mujore në vend që të paguanin çdo gjë menjëherë. Gjithashtu, iPhone Upgrade Program ofron garancinë e AppleCare së bashku me mundësinë për të marrë iPhone-in më të ri kur përdoruesi të ketë paguar të paktën 12 pagesa mujore për modelin e fundit. Për më tepër, Apple gjithashtu të ofron opsionin e kthimit të iPhone-it tënd për të marrë një çmim më të mirë për iPhone-in e ri.
Tashmë që shitjet e iPhone janë duke rënë, duket se Apple po kërkon mënyra të tjera për të fituar paratë. Këtë vit, Apple pati $33 miliardë fitime, $3 miliardë rënie nga viti i kaluar por një rritje prej $7 miliardë nga periudha e mëparshme. Gjithashtu, Apple pati një rënie shumë të madhe në Kinë, ku humbi plot $300 milionë.