Among Us kap 1.5 milion lojtarë aktivë

Among Us po bëhet një nga lojërat më të populluara të momentit

Among Us është një party game e lançuar për herë të parë në 2018 dhe bën fjalë për ekuipazh e një anijeje kozmike të cilët po kryejnë punët e tyre të përditshme dhe më dikë në mesin e tyre i cili ka si qëllim t’i vras ata dhe ta hedh fajin tek të pafajshmit. Mund ta mendoni si një përzierje e lojës Mafia dhe WereWolf e cila ndodh në hapësirë. Edhe pse nuk ka qënë e njohur në fillimet e veta, kohët e fundit po kthehet në një nga lojërat më të luajtura dhe me numrin më të lartë të shikimeve në Twitch.

Popullariteti i madh që ka fituar kohët e fundit ka shkaktuar shumë probleme serveri për zhvilluesit e lojës e cila është një skuadër prej tre vetash e bazuar në Washington. Në një postim në Twitter gjatë kësaj fundjave ata bënë të ditur që serverat e Among Us janë plot përsëri dhe se ata kishin arritur rreth 1.5 milion lojtarë në të njëjtën kohë. Loja në këto momente ndodhet e treta si një nga lojërat më të luajtura në Steam me rreth 200,000 lojtarë. Lojtarët më të shumtë janë prej versionit mobile e cila është falas.

Among Us është një lojë e cila përveç faktit që është shumë argëtuese të luash me miqtë, të sjell edhe emocione nga më të ndryshmet. Do të ndieni tension në momentet kur dyshimi bie mbi ju, zemërim kur humbni dhe ankth kur jeni gati për t’u zbuluar.