Ky do të jetë një vit mjaft i ngjeshur për Activision
Ky do të jetë një vit mjaft i ngjeshur për Activision
Në mënyrë aspak surprizuese, këtë vit do të kemi një lojë të re Call of Duty. Gjatë mbledhjes rreth rezultateve financiare të tre-mujorit të fundit të 2019, COO i Activision Coddy Johnson konfirmoi se testimet e lojës kanë ngjallur entuziazëm.
Nuk dihet ende se cila studio po e zhvillon lojën, por me shumë mundësi nuk do të jetë Infinity Ward. Këta të fundit sollën në gusht të vitit të kaluar Modern Warfare, për të cilin Activision thotë se ka shitur shumë më shumë se loja paraardhëse, Black Ops 4, duke sjellë një rritje dyshifrore në përqindje. Megjithatë, kompania thotë se nuk pret që loja e këtij viti të performojë po kaq mirë, por nuk e specifikoi se pse.
Gjatë të njëjtës mbledhje, CEO Bobby Kotick tha se më shumë remasters dhe remakes janë duke ardhur pas suksesit të Crash Bandicoot dhe Spyro. Megjithatë, jo të gjitha do të jenë remake të mirëfillta, pasi do të kemi dhe rikthime dhe riimagjinime të serive të vjetra.
Gjatë të njëjtës mbledhje, presidenti i Blizzard J. Allen Brack gjithashtu konfirmoi se Warcraft 3: Reforged nuk pati lançimin e mirë që pritej.