Ka shumë momente të paharrueshme në historinë e koncerteve live, që nga Ozzy Osbourne që i kafshon kokën një lakuriqi nate në skenë, deri te Jimi Hendrix që i vë flakën kitarës në skenë. Këto ishin emocionet e të papriturave kur koncertet bëheshin fizikisht dhe pandemia e coronavirus akoma nuk njihej.
Gjithsesi, Travis Scott ja doli të mbante një koncert në fillim të këtij viti, kur performoi virtualisht për 12.3 milionë fansa në Fortnite. Ky ishte eventi i parë i një tipi të tillë që kishte organizuar Fortnite.
I pari por jo i fundit. Kompania e Fortnite, Epic Games ka njoftuar një seri koncertesh tre javore që do të fillojë në 12 shtator me një performancë nga Dominic Fike, live nga Los Angeles studio e Epic, që është dizenjuar fiks për këto koncerte brenda lojës.
Fortnite është e idesë që koncertet cirtuale nuk janë vetëm një krijim i pandemisë. Kompania shpreson që edhe kur teatrot dhe arenat të hapen sërish, artistët të vijnë sërish të luajnë në skenën virtuale të Fortnite, në të njejtën mënyrë siç mund të bëjnë në Cleveland ose New York.
“Kjo është si një ndalesë turi,” u shpreh Nate Nanzer, një përfaqësues i Fortnite. “Nëse ti je në tur, do të duash të bësh një ndalesë në skenën e Fortnite. Është një mënyrë unike për të performuar para një audience që ndoshta nuk e arrin dot me mjete të tjera.”
Plus Fortnite është e aftë në të mbledhurit të një audience. Aq e aftë, sa ka kthyer një lojë free-to-play në një biznes multimiliardë-dollarësh.
Sado që Fortnite gjendet në betejë ligjore me Apple dhe Google për momentin, ajo sërish duket se është në zgjerim të vazhdueshëm, këtë rradhë duke sjellë një platformë muzikore, nëse mund ta quajmë të tillë, brenda lojës.
A do të jetë Fortnite një ndalesë muzikore në të ardhmen? Me një audiencë prej 350 milionë lojtarësh, padyshim që do të ketë tërheqje edhe në aktet muzikore, mbi të gjitha në një periudhë kur të gjitha arenat dhe stadiumet botërore janë të mbyllura. Mbetet të presim dhe të shohim se si do të rezultojë ky plan për Epic Games.