Ylli i Arsenal Mesut Ozil është hequr nga PES 2020

Heqja e Ozil ndodhi pas komenteve të tij rreth Kinës në Twitter

Mesut Ozil i Arsenal është hequr nga versioni kinez i Pro Evolution Soccer 2020 pas komenteve të tij lidhur me situatën e myslimanëve uighur që thuhet se mbahen të burgosur në kampe në Xinjiang, Kinë.

31 vjeçari, i cili nuk i përdor shpesh Twitter dhe mediat e tjera sociale gjatë sezonit të Premier League, postoi një imazh të flamurit të ish-republikës së Turkestanit Lindor me një mesazh që i quante uighurët në Kinë “luftëtarë që i rezistojnë persekutimit.”

“Në Kinë, Kuranet digjen, xhamitë mbyllen, shkollat islamike u ndaluan dhe akademikët fetarë u vranë një nga një. Pavarësisht kësaj, myslimanët qëndrojnë të heshtur,” – shkruajti Ozil në Twitter.

Pas këtyre komenteve, shumë faqe në Kinë thanë se nuk do të postonin më lajme në lidhje me Ozil, ndërkohë që një lojë në Kinë ndaloi prodhimin e kartave të Ozil pas lajmit.

Tani, ylli i Arsenal gjithashtu është hequr nga versioni kinez i Pro Evolution Soccer, i publikuar nga NetEase, të cilët thanë se komentet e Ozil lënduan ndjenjat e fansave kinezë dhe dhunuan shpirtin sportiv të dashurisë dhe paqes.

Ministria e Jashtme e Kinës gjithashtu foli për komentet e Ozil, duke thënë se lojtari turko-gjerman është mashtruar nga lajmet fallco, ndërkohë që shumë komente në Weibo kërkonin që 31 vjeçari të hiqej.

“A e di se si ndihen fansat e Arsenal këto dy ditët e fundit?” – shkruante një koment. “Ata ende nuk po kuptojnë se si një klub dhe një idhull i tyre e ka bërë këtë gjë. Nëse kërkon të sulmosh Kinën, ti ke aq rëndësi për ne sa një milingonë e pisët.”

Përveç heqjes së Ozil, televizionet kineze ndaluan transmetimin e ndeshjes së Arsenal me Manchester City në Premier League. Kjo ndodhi pasi të gjitha referencat e Ozil u fshinë nga faqet kineze.

Kjo është hera e dytë që investitorët kinezë kanë ndikuar zhvilluesit e videolojërave. Më herët gjatë këtij viti, lojtari profesionist i Hearthstone Chung ‘Blitzchung’ Ng Wai u bë ban pasi kërkoi pavarësinë e Hong Kong gjatë turnamentit GrandMasters. Për këto komente, ai u bë ban nga Blizzard, një vendim i cili krijoi polemika të shumta.