eFootball PES 2020 Review

Mbreti u rikthye!

2020 është një vit gjigand për Pro Evolution Soccer. Loja ka ndryshuar emrin e saj në eFootball Pro Evolution Soccer 2020, duke theksuar aspektin esports që sa vjen dhe rritet me hapa të shpejtë, ndërkohë që bashkëpunimet e reja të fuqishme dhe mode-t e reja që pritet të vijnë me ardhjen e UEFA Euro 2020 e fuqizojnë akoma dhe më shumë një prej serive më të rëndësishme të Konami. Edhe kundërshtari kryesor i lojës, FIFA e EA Sports po i ndjen efektet e këtyre ndryshimeve, duke humbur disa licensa mjaft kryesore për ta ndaj PES, përfshirë këtu dhe licensën ekskluzive për ekipin e Juventus.

Rruga drejt lançimit të PES 2020 ka qënë shpesh herë e ngjashme me merkaton e futbollit në jetën reale, ku dy rivalët e përjetshëm janë munduar të marrin sa më shumë veçori nga duart e tjetrës. Duke arritur marrëveshje me ekipe dhe liga të mëdha si dhe me vetë UEFA për të sjellë falas një update mjaft të madh dhe të rëndësishëm për fansat e futbollit, PES këtë vit duket të jetë një opsion mjaft i mirë për ata që janë lodhur ose mbase duan të provojnë diçka ndryshe nga FIFA dhe padyshim që këtë gjë e bën duke i tërhequr lojtarët me anë të gameplay-t mjaft të mirë në fushën e blertë.

Për herë të parë pas shumë vitesh, FIFA po ndjen rrezikun që i kanoset nga rivalët e tyre kryesorë, pasi përmirësimet në mënyrë metodike vit pas viti nga Konami e kanë bërë PES 2020 një lojë vërtet të mirë futbolli. Kjo konkurrencë është një gjë e mirë sidomos për ne lojtarët, pasi padyshim që vitin e ardhshëm do të shohim diçka inovative nga të dyja palët, në përpjekje për të qënë loja më e mirë futboll e vitit. Oh, dhe nëse jeni kuriozë nëse do të keni mundësi të luani si Shqipëria ose Kosova, mos u bëni merak, pasi të dyja ekipet janë plotësisht të licensuara në lojë dhe ishin zgjedhja jonë për ndeshjen tonë të parë.

Sapo del nga tunelet dhe futesh në fushë, PES 2020 duket menjëherë një lojë shumë e ndryshme nga viti i kaluar. Shpejtësia e lojës është ulur sërish, duke i ofruar lojtarëve futboll që ndihet realistik dhe më metodik, ku çdo pasim dhe lëvizje duhet menduar dhe nuk e ke mundësinë ta çosh topin nga mbrojtja në sulm për punë sekondash. Lojtarët dhe gjithashtu topi kanë një ndjesi peshe duke i bërë ata të duken pak të ngadaltë në fillim, por pasi mësohesh arrin të kuptosh se ky stil loje përshtatet mjaft mirë dhe është shumë i ngjashëm me jetën reale. Kamera e re e sjellë këtë vit, “Stadium”, e ndihmon edhe më shumë këtë aspekt, pasi loja duket shumë e ngjashme me atë që shohim në ndeshje në televizor dhe të jep mundësinë të shohësh të gjithë fushën.

Rritja e shikueshmërisë është mjaft e rëndësishme, pasi PES 2020 është një lojë që i jep shumë rëndësi përdorimit të hapsirës në fushë dhe pozicionimit të lojtarëve. Edhe pse, siç thamë më lart, loja është më e ngadaltë se zakonisht, çdo ndeshje ka momentet e saj shpërthyese dhe emocionuese kur një lojtar merr topin dhe bën një sprint nga krahët. Shpejtësia e lojtarëve më të mirë të lojës është menjëherë e dukshme, por nuk është overpowered, pasi lojtarët duhet të gjejnë hapsirën për ta përdorur këtë shpejtësi.  Shumica e ndeshjeve të PES 2020 janë mjaft të vështira në varësi të taktikave që përdor secila skuadër, por një gol shpesh ndryshon gjithçka. Papritmas, loja bëhet më e hapur ndërkohë që ekipi në disavantazh hidhet në sulm duke kërkuar të gjejë golin e barazimit. Këtu, këta lojtarë shkëlqejnë në kundërsulmet e shpejta, duke i marrë me rradhë mbrojtësit që mbeten mbrapa.

Në anën tjetër, kur nuk ke shumë hapësirë për të luajtur, pozicionimi dhe aftësia e lojtarit janë primare. AI shpesh ndodhet aty për të të ndihmuar duke të dhënë mundësi pasimi dhe lojtarë anësorë të mirë si Messi dhe Mbappe shpesh kthehen mbrapa për të fituar topin larg mbrojtjes së kundërshtarit. Lojtarët gjithashtu vrapojnë ndonjëherë pas mbrojtjes së kundërshtarit, por është e vështirë të bësh një pasim perfekt për t’i gjetur ata, ndryshe nga vitet e mëparshme. Për këtë arsye, në lojë tashmë ka shumë mënyra për të bërë gola, duke filluar nga pasimet e shpejta për të kaluar mbrojtjen, tek krosimet dhe goditjet e fuqishme me kokë dhe më pas tek goditjet nga distanca. Megjithatë, goditjet për gol janë bërë mjaft të vështira me shtimin në lojë të “miss-kick”, një veçori e cila e bën pozicionimin dhe qëndrimin e lojtarit si dhe presionin që mbrojtja kundërshtare ushtron mbi të mjaft të rëndësishëm. Tashmë, duhet të mendohesh disa herë përpara se të gjuash ose të pasosh, pasi një goditje me kurriz nga porta me shumë mundësi do të shkojë larg kuadratit. Me ndihmën e Finesse Dribbling, një prej veçorive të reja më të rëndësishme të shtuara në lojë këtë vit, ke mundësi të gjesh hapësirën për të dalë në një pozicion goditjeje të mirë dhe për të shënuar një gol të rëndësishëm. Megjithatë, Finesse Dribbling është mjaft i vështirë për t’u mësuar dhe për t’u përdorur, prandaj ndonjëherë nuk funksionon siç duhet dhe duhet përmirësuar.

Edhe pse përmirësimet në sulm dhe kur je në kontroll të topit janë të shumta dhe mjaft cilësore, e njëjta gjë nuk mund të thuhet për mbrojtjen. Problemet me AI e lojës, sidomos në mbrojtje, janë ende pjesë e saj, pasi lojtarët e kontrolluar nga vetë loja përfundojnë zakonisht ose duke t’u hedhur për të të penguar ose duke të lënë të bësh ç’te duash me topin, sepse “harrojnë” detyrën e tyre kryesore. Gjithashtu, të mbash X shtypur gjatë gjithë kohës mund të bëhet e mërzitshme kur e luan lojën për një kohë të gjatë. Për ta bërë dhe më problematike mbrojtjen në lojë, arbitrat sillen në mënyrën më të çuditshme të mundshme. Në një moment, ti je duke luftuar me trup për të marrë topin në mesfushë dhe shkakton një faull dhe merr karton të verdhë pa asnjë arsye, ndërkohë që pak më vonë mbrojtësi kundërshtar tenton të të thyejë këmbën, por arbitri bën sikur nuk ka parë asgjë. Faullat e kotë jepen shpesh dhe sidomos në zonë. Në 10 ndeshjet e para që luajtëm mund të jetë dhënë 1 penallti në secilën prej tyre. Janë këto probleme të vogla në dukje të cilat e dëmtojnë vërtet eksperiencën e lojtarëve në Pro Evolution Soccer 2020, pasi një gabim i AI në mbrojtje mund të të kushtojë ty një ndeshje dhe ti nuk ke asgjë se çfarë të bësh.

Për sa i përket mode-ve të lojës, ishte premtuar që PES 2020 do të vinte me një ndryshim kolosal të Master League, karrierën offline që është prej vitesh pjesë e lojës. Këto ndryshime në pamjen e parë erdhën në formën e cutscene-ve të ndryshme, një pjesë e të cilave janë interaktive, duke të dhënë ty mundësinë të japësh mendimin tënd. Bordi drejtues mund të të pyesi ty rreth objektivave të këtij sezoni dhe gjithashtu do të marrësh pjesë në shumë konferenca për shtyp përpara ndeshjeve, me prezantimin e lojtarëve të rinj dhe gjithashtu do t’i flasësh ekipit tënd. Problemi këtu qëndron te fakti që zërat e trajnerit, lojtarëve, antarëve të bordit etj. nuk ekzistojnë, gjë që nuk i jep lojtarit mundësinë të përfshihet plotësisht në lojë. Për sa i përket menaxherit, tashmë ti nuk krijon një meanxher tëndin, por zgjedh një menaxher ose ish-lojtar të famshëm botëror si avatarin tënd në lojë. E kush nuk do të donte që Maradona të ishte shqiptar?

Ndryshime të tjera të Master League kanë të bëjnë me transferimet e lojtarëve, të cilat nuk janë më aq të çmendura si në të shkuarën. Akoma do të shohësh ekipe që paguajnë çmime të çmendura për lojtarë që mbase nuk i hynë dhe aq në punë, por të paktën duket pak më reale. Mbase një ekip nuk do të harxhojë miliona për një lojtar 33 vjeçar, por në qoftë se PSG do të blejë Sadio Mane, padyshim që do të harxhojnë mbi 100 milionë euro. Përveç kësaj, Master League ngelet e njëjta si në vitet e mëparshme, ku ti merr një grup lojtarësh dhe i përmirëson ata me kalimin e kohës. Sado që u premtuan ndryshime, Master League sjell shumë pak gjëra të reja në lojë.

Duke pasur “eFootball” në titull, lojtarët padyshim presin që PES 2020 të ketë sjellë ndryshime të mëdha në aspektin online të lojës, që ka qënë mbase një prej pikave më të dobëta të PES në krahasim me FIFA gjatë viteve të fundit. MyClub ngelet ende një prej mode-ve më të mira të Pro Evolution Soccer, por është gjithsesi shumë mbrapa Ultimate Team, për shkak dhe të problemeve me infrastrukturën e serverave të lojës, të cilët shpesh herë kanë probleme. Megjithatë, microtransactions, edhe pse janë ende pjesë e MyClub, nuk janë të detyrueshme dhe nuk të duhet të shpenzosh shuma marramendëse në qoftë se je pak i duruar.

Ndërkohë që Become a Legend ka ngelur njësoj, një tjetër mode mjaft interesant është shtuar, i quajtur Matchday. Çdo javë zgjidhet një ndeshje e veçantë dhe ju zgjidhni një prej ekipeve që luajnë dhe ndesheni me lojtarë të tjerë nga bota që kanë zgjedhur ekipin kundërshtar. Në këto ndeshje ju fitoni pikë për ekipin tuaj dhe ideja është që lojtarët që mbledhin më shumë pikë do të zgjidhen nga Konami për një finale të madhe, e cila do të bëhet e gjitha livestream. Matchday jep gjithashtu shpërblime për MyClub, prandaj edhe nëse nuk jeni të interesuar për finalen, gjithsesi ja vlen të luhet.

Aspekti teknik dhe grafik i lojës ka qënë gjithashtu një prej pikave të tjera të forta të Pro Evolution Soccer gjatë viteve. Nuk është se janë bërë ndryshime shumë të mëdha në krahasim me vitet e kaluara, por në përgjithësi grafikat në PES 2020 duken mjaft të përmirësuara, për shkak të përmirësimit të ndriçimit në Fox Engine. Kjo vihet re më së miri në fytyrat e lojtarëve të ekipeve të licensuara, të cilët kanë kaluar të gjithë një skanim 3D, por edhe në animimet e tyre, duke i dhënë lojtarëve si Cristiano Ronaldo, David Beckham, Ronaldinho e shumë të tjerë tipare mjaft të veçanta në animimet e tyre. Stadiumet e licensuara si Allianz Stadium, Camp Nou dhe Old Trafford janë fantastikë. Megjithatë, lojtarët që nuk janë skanuar nuk janë dhe aq mbresëlënës dhe menutë e lojës, edhe pse u premtua që do të ndryshoheshin, ngelen ende mjaft konfuzuese. Ndërkohë, komentimi ka ngelur ende i përsëritur dhe herë pas here bezdisës.

Problemi i licensave ka qënë dhe do të jetë gjithmonë mangësia më e madhe e Pro Evolution Soccer, por për sa kohë shkarkoni një option file gjithçka është në rregull. eFootball PES 2020 i ofron lojtarëve një prej lojërave më realistike ndonjëherë të futbollit, me gameplay-n e saj shumë të mirë dhe me grafikat mbresëlënëse. Edhe pse padyshim që ka probleme të vogla dhe disa prej veçorive të lojës duhet të përmirësohen, eFootball PES 2020 mbetet një prej lojërave më të mira Pro Evolution Soccer ndonjëherë dhe është një rivale e denjë për FIFA 20.