Hitman rikthehet përsëri dhe kësaj here me një lojë të tretë duke plotësuar trilogjinë e saj. Por a do të arrijë dot Hitman 3 në nivelin e duhur për ta mbyllur me sukses këtë trilogji apo do të jetë thjesht një zhgënjim siç kemi parë në shumë lojëra të ndryshme. Për të zbuluar rreth lojës më të fundit nga IO Interactive sigurohuni që të na ndiqni.
Historia e Hitman 3 është e lidhur në mënyrë direkte me historinë e dy lojërave të mëparshme dhe nis atje ku ka mbaruar Hitman 2. Agent 47 bashkë me aleatët e tij, Lucas Grey dhe Diana Burnwood, janë afër arritjes së qëllimit të tyre i cili është rrëzimi i një organizate të quajtur Providence. Gjatë lojës Hitman 2 ata arrijnë të kapin liderin e tyre të quajtur The Constant. Por ky i fundit shpëton prej tyre duke sjellë shumë ndryshime në mënyrën e zhvillimit të ngjarjeve duke filluar që prej vdekjeve dhe deri tek tradhtitë.
Gjithashtu ju do të filloni të krijoni një lidhje me Agent 47 pasi mund të shohim në momente të ndryshme, teksa ai reflekton me veten ose bisedon me të tjerët, duke treguar një anë tjetër të vrasësit me të cilin jemi mësuar në lojërat e mëparshme.
E gjitha kjo realizohet shumë bukur. Fatkeqësisht gjatë gameplay nuk do t’iu ofrohet shumë histori por këtu hyjnë në lojë skenat e ndryshme kinematike të cilat e mbulojnë këtë gjë duke iu treguar më shumë rreth ngjarjeve që janë zhvilluar dhe që do të zhvillohen.
Karakteret janë të krijuara bukur deri diku dhe në momente të ndryshme na dukej qesharake fytyra e Agent 47. Për sa i përket botës, ajo është e krijuar këndshëm duke iu ofruar një larmishmëri të madhe ambientesh të cilat janë të detajuara në mënyrë pothuajse perfekte dhe tepër impresionuese. Ne lojën e luajtëm në PS5 në Performance Mode ku ju do të mund të luani në 60 fps duke sakrifikuar pak nga ana grafike. Ju mund të luani gjithashtu edhe 30 fps duke përmirësuar grafikat që kjo lojë iu ofron.
Për sa i përket gameplay, nuk është se kemi ndonjë ndryshim tepër të madh ose shtim të veçorive të reja. Edhe pse shumë prej jush mund të mendoni se stealth është pika kyçe e kësaj loje, e keni gabim. Hitman 3 iu ofron një larmishmëri të madhe zgjedhjesh dhe metodash duke iu lejuar të shkoni në përballje të drejtëpërdrejte ose të visheni si dikush dhe të krijoni rrugën tuaj drejt objektivit që ju keni. Gjithashtu ju mund t’i kryeni të dyja këto.
Hitman 3 iu ofron afërsisht 8-9 orë gameplay nëse zgjidhni t’i bini gjërave shkurt. Por nëse vendosni që të bëheni më shumë pjesë e lojës ju do të përballeni me një shumëllojshmëri të madhe gjërash për të bërë, duke filluar që prej vrasjeve me mollë ose soda dhe deri tek ato me peshk. Po, e kemi seriozisht, me peshk. Mund të ketë qenë koc ose levrek, por nuk ju futëm me kaq vëmendje këtij aspekti. Sa herë që ju do t’i ktheheni një misioni, ju do ta realizoni atë në një mënyrë tjetër.
Kur behët fjala për muzikën dhe audion, duhet të themi që ishte perfekte. Kolona zanore që Hitman 3 ka, i përshtatej shumë bukur lojës duke iu dhënë një emocion tepër të veçantë. Gjithashtu edhe zhurmat e ambientit ku jeni ose zërat e njerëzve janë të organizuara bukur dhe nëse rrini të dëgjoni me vëmendje bisedën e ndonjë personazhi që keni pranë, ju mund të zbuloni të dhëna të cilat do t’iu hyjnë në punë për të arritur objektivin tuaj, ose do të përballeni me një bisedë gazmore.
Për ta përmbledhur mund të themi që Hitman 3 është loja më e mirë e të gjithë trilogjisë së Hitman dhe mund të shtojmë se IO Interactive ka kryer një punë tepër të mirë. Ju mund të kryeni vrasje nga më të ndryshmet ose të arrini objektivin tuaj nëpërmjet mënyrave të ndryshme sipas preferencës që ju keni. Nëse keni në mendje një vrasje perfekte, ju mund ta realizoni atë në Hitman 3.