Po bëhen afërsisht më shumë se 5 vite që thashetheme dhe leaks të ndryshëm qarkullojnë rreth Grand Theft Auto 6 të cilët njerëzit po e presin me padurim. Por një leak i fundit mesa duket na tregon se Rockstar ka në plan ta vonojë akoma edhe më shumë GTA 6.
Ky leak është bërë nga YouTuber Tom Henderson i cili njihet për leaks pothuajse të saktë në lojëra si Call of Duty, Battlefield dhe së fundmi edhe në Grand Theft Auto. Në videon e tij të fundit, ai ka folur rreth informacioneve të cilat i ka marrë nga burime të sigurta. Ai është shprehur se GTA 6 do të vonohet akoma dhe mund të vijë më 2025.
Ndër arsyet që pse GTA 6 do të vijë kaq vonë, Henderson është shprehur se kjo gjë do të ndodh sepse momentalisht Rockstar po bën akoma një mal me para nga GTA V dhe se “kriza” e GPU dhe konsolave do të ulte fitimet e tyre. Prandaj sipas Henderson, Rockstar po pret momentin e duhur për të sjellë GTA 6.
Përveç kësaj, GTA e ardhshme do të ketë një hartë e cila do të ndryshojë shpesh sipas sezoneve dhe faktorëve të ndryshëm. Gjithashtu mundësia që të kemi shumë karaktere të cilët mund të luhen dhe ndër ta mund të ketë edhe një femër ekziston akoma.
Edhe pse asgjë nuk është akoma e konfirmuar, Tom Henderson njihet për leaks pothuajse të saktë që sjell.