Mbështesni GameON Albania duke përdorur kodin support-a-creator: GAMEONALBANIA
Po kerkoni për diamante në Free Fire Falas?! Klikoni këtu për të marrë pjesë në Giveaway për Free Fire Diamonds
PUBG Corp. po teston mënyra për t’i dhënë zgjidhje problemit
PUBG Mobile ka patur një rritje stratosferike në tregun e Azisë juglindore që prej lançimit të saj vitin e kaluar. Veçanërisht, lojtarët indianë u tërhoqën shumë nga loja, e cila tani është tepër popullore në këtë vend. Ndryshe nga versioni në PC, PUBG Mobile është free-to-play, çka e ndihmon lojën në rritjen e popullaritetit. Por, kur diçka bëhet shumë popullore, mund të ndodhin edhe gjëra të këqija. PUBG Mobile nuk bën përjashtim, duke u bërë pjesë e polemikave të mëdha në Indi.
Raportohet se disa lojtarë kanë vdekur duke luajtur lojën më shumë seç duhet e se një lojtar tjetër është kapur duke vjedhur para nga familja e tij për t’i shpenzuar në lojë. Madje, disa qytete e kanë ndaluar PUBG Mobile, pas shqetësimit të ngritur nga prindërit e lojtarëve. E së fundi, disa lojtarë janë arrestuar pasi janë parë duke luajtur lojën në publik.
Në një përpjekje për të treguar më shumë përgjegjësi nga ana e PUBG Mobile, loja ka nisur të ndalojë lojtarët që kanë luajtur për një kohë të gjatë. Ky ndryshim, fillimisht i vënë re nga disa përdorues në Twitter, bën që loja të afishojë një “kujtesë për shëndetin” që e ndalon lojtarin të luajë pas një numër orësh të caktuar duke luajtur. Mesazhi i kërkon lojtarëve të rikthehen më vonë në një orë të caktuar. Kjo lëvizje është e ngjashme me masat e marra në Kinë për të parandaluar varësinë ndaj videolojërave.
Ndërsa disa përdorues raportojnë se po e shohin mesazhin pas 2 deri në 4 orë duke luajtur, disa po ndalohen pas 6 orësh. Ky ndryshim nuk është bërë për të gjithë, por me siguri do të ndodhë për shumë përdorues në ditët në vazhdim. Dihet që lojtarët do të gjejnë mënyra për të mos ndaluar së luajturi dhe rezultati do të jetë një lojë macja-me-miun midis lojtarëve dinakë të PUBG Mobile dhe Tencent. Diçka e pritshme, duke parë se ndalimi i diçkaje kurrë nuk ka funksionuar tërësisht. Në fakt, është mjaft shqetësuese që prindërit nuk kanë arritur të edukojnë fëmijët e tyre dhe kanë përfshirë shtetin në punën e tyre.
