Çfarë është Albania Life Simulator?

Nuk e mendonim se do arrinim ndonjëherë në këtë pikë, por ja ku jemi. 2021 na përball me një lojë që quhet Albania Life Simulator. Praktikisht stereotipet e shoqërisë tonë të vendosura në një lojë ku detyra juaj është të mbroheni nga vendasit e acaruar me ju.

Sipas vetë përshkrimit të lojës në Google Store: “Albania Life Simulator është një simulim realistik i realitetit në Shqipëri. Ju do e gjeni veten në mes të një qyteti me askënd rreth e përqark, derisa krejt papritur do të dëgjoni një boss theme dhe do të shikoni se si vendasit e inatosur do ju sulmojnë. Ju duhet të mbroni veten prej tyre dhe të shijoni jetën tuaj në vendin e Shqipërisë.”

Loja është sjellë nga Bruh Gaming Game Studios dhe disa nga veçoritë e saj përfshijnë: përdorimin e armëve, makinave, muzika shoqëruese, vrasje dhe vrasje përmes automjeteve.

Pjesë e përshkrimit është edhe një fragment që thotë: “kini parasysh të qëlloni të gjithë përpara se ata t’ju qëllojnë ju. Ky është ligji në këtë vend.” Pesimizmi ka kaluar çdo skaj të mundshëm domethënë.

Kur vjen puna te reviews pastaj loja të merr në qafë. Absolutisht thuajse çdo “përdorues” i ka dhënë pesë yje. Një prej tyre madje ka thënë se loja: “ka grafika të gjeneratës së ardhshme dhe se e ka pritur më shumë se GTA 6”. Ne e vlerësojmë entuziasmin, por ato grafikat e gjeneratës së ardhshme, nuk do i besojmë.

*Ne po ashtu duam ta bëjmë të qartë që loja është veçse një troll nga zhvilluesit dhe asgjë më shumë. Çdo event dhe prezantim në lojë nuk ka aspak të bëjë me Shqipërinë dhe shqiptarët.*

Nëse jeni kuriozë për ta parë lojën, këtu keni linkun e saj në Google Play. Shihni e bëni. Poshtë gjeni edhe një video gameplay: