Bugsnax ju çon në një botë të çuditshme ku jetojnë insekte të krijuara nga ushqime të ndryshme. Ju jeni një gazetar që beson në ekzistencën e kësaj pas një videoje që ju dërgohet nga Liz, për t’u nisur më pas në një quest për të mësuar më shumë për botën ku ajo jeton.
Pasi të shkoni aty do të zbuloni se Liz ka humbur dhe se gjërat në këtë vend, nuk janë siç ishin dikur. Qëllimi juaj është ta ndihmoni komunitetin të kthehet në lavdinë e tij të dikurshme, që të kuptoni se çfarë i ndodhi Liz dhe që të ktheheni më vonë në shtëpi.
Shumica e gameplay-it bëhet përmes quests që ju jepen nga banorët e qytezës. Ata të gjithë duan insekte specifike që mund të hanë ose eksperimente të ndryshme që duan të provojnë. Është detyra juaj t’i përmbushni këto nevoja.
Personazhet që takoni janë gjithashtu unikë, me një aktrim të bukur zanor dhe stile të veçanta të inkorporuara në to. Të gjitha këto ju ndihmojnë në fund që të gjeni Liz. Loja është e disponueshme që tani në PS Store dhe Epic Games Store. Ajo do të jetë falas në PS5 për subscribers-at e PS Plus deri në datë 4 janar 2021.