Google do të sjellë lojërat Android për PC në 2022

Google po bën hapin tjetër kur bëhet fjalë për lojërat ekskluzive të Android OS. Google po planifikon të lançojë një shërbim të ri lojrash të quajtur Google Play Games që do të jetë i disponueshëm në Microsoft Windows në vitin 2022.

Google sigurisht që ka zgjeruar përpjekjet e tij në lojëra gjatë viteve të fundit. Google Stadia ka shpenzuar dy vitet e fundit duke konkurruar me pajisjet më tradicionale të lojërave të konsolave dhe PC përmes një shërbimi streaming, por që atëherë ka mbyllur studiot e veta të zhvillimit të lojërave. Duket se tani gjigandi i internetit po shikon një mënyrë të re për të sjellë bibliotekën e tij të lojërave mobile në PC në vitin e ardhshëm.

Greg Hartrell, drejtori i produkteve të Google për lojëra në Android dhe Google Play, tha se Google Play Games do të jetë më shumë sesa thjesht ofrimi i lojërave të mëparshme vetëm për celular në PC. Do të ketë gjithashtu një mekanizëm që do të lejojë kalimin pa probleme nga një pajisje celulare ose Google Chromebook në PC me Windows dhe anasjelltas.

Një zëdhënës i veçantë i Google tha se kompania ka ndërtuar atë aplikacion që do t’i lejojë përdoruesit të luajnë lojëra Android në PC. Kjo do të thotë se nuk ka partneritet me asnjë kompani tjetër për ta ndërtuar atë. Se si ky vendim do të ndikojë në mënyrën si funksionon është padyshim ende për t’u parë.