OG zbulon ekipin e tyre të CS:GO me NBK-, Aleksib dhe valde

A do të jenë ata po aq të suksesshëm në CS:GO?

OG, një prej organizatave më prestigjoze në Dota 2, zbuloi ditën e djeshme ekipin e tyre të parë në CS:GO.

Organizata shpenzoi shumë para për tre lojtarë: Nathan “NBK-” Schmitt, ish-lojtar i Vitality, Aleksi “Aleksib” Virolainen, ish-kapiteni i ENCE dhe Valdemar “valde” Bjørn, ylli i North gjatë dy viteve të fundit.

Issa “ISSAA” Murad, i cili ishte në stolin e HellRaisers nga shtatori dhe i riu Mateusz “mantuu” Wilczewski nga ALTERNATE aTTaX plotësojnë ekipin e OG në CS:GO.

OG ka negociuar me lojtarët për disa muaj. Gjatë procesit, organizata kishte si qëllim të merrte Valentin “poizon” Vasilev, i cili firmosi me Complexity dhe Elias “Jamppi” Olkkonen, i cili kishte marrë më parë një ban VAC dhe nuk mund të luajë në Majors.

“CS:GO përfaqëson çdo gjë që vlerësojmë në esports: është spektakolare dhe fantastike për t’u parë, niveli i konkurrencës është i pabesueshëm dhe vazhdon të rritet,” – tha OG në një deklaratë.

Shumë fansa do të jenë kurioz të shohin nëse Aleksib mund ta bëjë këtë ekip po aq të suksesshëm sa ENCE. Gjithashtu presion ka dhe mbi valde, nga i cili fansat presin që ai të luajë sërish si një prej 20 lojtarëve më ët mirë në botë. Forma e tij ishte në rënie me North pasi ai u bë in-game leader i ekipit.

OG është organizata e tretë e madhe që vjen në CS:GO me një ekip të njohur. Evil Geniuses blenë ekipin e NRG në shtator dhe 100 Thieves morrën ekipin e Renegades në tetor. Dignitas gjithashtu pritet të rikthehet në Counter-Strike me një ekip që do të ketë pjesë veteranët suedezë Patrik “f0rest” Lindberg dhe Christopher “GeT_RiGhT” Alesund.

Pavarësisht nëse ekipi i OG do të ketë sukses, pritshmëritë do të jenë të larta duke parë kalibrin e lojtarëve të tyre dhe suksesin e tyre në Dota 2, ku janë shpallur kampionë të The International dy herë rradhazi.