Është turp që pas kaq shumë kohësh të duhet të përballemi ende me raste si: mosnjohja e Kosovës në PUBG ose në Apple Maps, por në të njejtën kohë është fantastike të shohësh se si njerëzit bashkohen për të sjellë ndryshimin.
Është konfirmuar se iniciativa për të vendosur Kosovën në PUBG Mobile është konsideruar nga Tencent dhe PUBG Mobile Esports. Sipas një postimi në instagram nga ‘lakonostra_gaming’, 29 nga 30 administratorë kanë votuar pro për vendosjen e vendit në lojë.
Peticioni i nisur për të njohur Kosovën në PUBG Mobile ka mbledhur rreth 10,000 firma në momentin që po flasim.
“Kjo nuk do të thotë përçarje mes dy shqiptarëve, por do të thotë që edhe lojtarët nga Kosova do të kenë të drejtë për pjesëmarrje në gara internacionale, gjë e cila ka qenë dhe është e ndaluar. Do të vazhdojmë të jemi të bashkuar për të dominuar Europën dhe më pas platformën Globale,” shkruan ekipi i Lakonostra në instagram.
Tashmë mbetet të presim për konfirmimin zyrtar nga ana e Tencent dhe PUBG Mobile Esports, por mund të themi me bindje se kjo ishte një fitore për gaming në rajonin tonë.