Epic Games ka konfirmuar se nuk ka asnjë plan për evente live këtë vit, përfshirë këtu Fortnite World Cup 2021. Është diçka kjo që shumë fansa, sado që e prisnin, i druheshin.
Skena kompetitive e Fortnite është ndër ato që është lëkundur më shumë në 2020. Impakti që Covid-19 do të linte mbi botën ishte diçka që askush nuk mund ta parashikonte. Për këtë arsye Epic Games ka vendosur se është ende shumë e rrezikshme që të mbajë evente live së shpejti.
“Synimi ynë është që të mbajmë turnamente globale fizike sërish, por nuk mund të vëmë këtë si prioritet mbi shëndetin dhe sigurinë e lojtarëve tanë,” thanë ata. Gjithsesi, kjo nuk do të thotë që nuk do të ketë fare kompeticione.
“Ne do të vazhdojmë të mbajmë kompeticione online përgjatë 2021 me shpresën se në një të ardhme do të rikthehet mundësia e të mbajturit të tyre fizikisht.”
Ky është një lajm i hidhur për fansat dhe lojtarët anë e mbanë botës, por të njejtën kohë, duke parë edhe situatën dhe rrethanat në cilat ndodhemi, është mëse e kuptueshme.