Zbulohen 24 ekipet e CS:GO që do të konkurrojnë në ESL Pro League

13 prej tyre nuk do të mund të bien nga kategoria

ESL konfirmoi gjatë ditës së djeshme se 24 ekipe në Counter-Strike: Global Offensive do të konkurrojnë në Season 11 të Pro League, 13 prej të cilave kanë lidhur kontrata afatgjata dhe nuk mund të bien nga kategoria në të ardhmen.

Këto 13 ekipe janë mousesports, Fnatic, Astralis, Complexity, ENCE, Evil Geniuses, FaZe Clan, G2 Esports, Natus Vincere, Ninjas in Pyjamas, Team Liquid, Team Vitality dhe 100 Thieves. Ato firmosën “Louvre Agreement“, që i bën ato aksionerë kryesorë të ligës dhe i jep akses atyre në programin e shpërndarjes së fitime nga liga.

Heroic, North, Renegades, Sharks dhe Tyloo do të marrin pjesë si ekipe nga finalet e Season 10. Furia, Godsent, OG dhe Virtus.pro kualifikohen nëpërmjet renditjes botërore të ESL dhe forZe dhe BOOM gjithashtu kualifikohen nëpërmjet ESEA Mountain Dew League.

Season 11 i ESL Pro League nis në 16 mars dhe do të zgjasë 4 javë. Ekipet do të luftojnë për një prize pool prej $750,000, me finalet që do të zhvillohen në një event live tre-ditor.