Pokimane bëri një stream Vtubing në Twitch

Zakonisht kur streamerja Imane “Pokimane” Anys del live në Twitch për 5.5 milionë ndjekësit e saj, mund të prisni që të shikoni fytyrën e saj teksa ajo reagon ndaj lojës që po luan. Së fundmi ajo i ka ndryshuar pak gjërat, duke zbuluar një model 3D anime të vetes së saj, që ishte përshtatur për të ndjekur lëvizjet e saj në jetën reale.

Me fjalë të tjera ajo po testonte botën e “Vtubbing“, ose ndryshe personaliteteve në YouTube që transemtojnë si vajza virtuale. Sado që nuk është e re si praktikë, gjatë viteve të fundit Vtubing ka parë një rritje të konsiderueshme në popullaritet dhe shikueshmëri, në pikën ku ka edhe adresa të dedikuara në media sociale për to.

Në YouTube, videot me Vtubers mund të marrin me qindra dhe mijëra shikime dhe ku ka shikime ka edhe para. Vtubing është një zhanër në vetëvete dhe ka njerëz që i kanë dedikuar karrierën asaj.

Transmetimi i Pokimane siç e thamë ishte më shumë diçka eksperimentale. Ajo nuk është e përkushtuar ndaj kësaj praktike, por ajo tha se do e përdorë këtë metodë kur të bëjë transmetime pa një kamer që e kap në fytyrë.

“Stream-et pa kamerë janë shumë të rehatshme,” tha ajo gjatë livestream-it. “Mbi të gjitha kur lodhesh ndonjëherë me njerëzit që po të komentojnë. Do preferoja ndonjëherë që të komentonin këtë vizatim timin anime.”

Për këdo që i ndjek livestream-et e Pokimane, kjo nuk është ndonjë gjë e habitshme. Ajo është kritikuar në të shkuarën që ka dalë para kamerës pa makeup, një pritshmëri idioteske që tregon qartazi se në sa presion vihen streamerat kur vjen puna te pamja e jashtme.

Pokimane kontaktoi një artist brenda komunitetit të saj për ta krijuar atë model dhe ju tha shikuesve të saj që t’i hidhnin një sy botës së Vtubing, nëse ju pëlqeu ajo që panë në stream.

“Nuk dua të ofendoj njeri duke e përdorur këtë… Thjesht mendoj se është një gjë shumë e bukur për t’u bërë kur nuk kam qef të dal para kamerës,” tha ajo në fillim të livestream-it.

Sado që kishte njerëz që nuk e preferuan këtë eksperiment të Pokimane, shumica e përqafuan idenë. Ndoshta ajo do e bëjë më shpesh këtë gjë në të ardhmen.