Në 2019 PewDiePie dhe gruaja e tij Marzia Kjellberg blenë një shtëpi të dytë në Japoni. Gjithsesi në një pikë kur ata nuk ndodheshin aty, hajdutët u futën brenda dhe vodhën disa gjëra të kushtueshme. Tani, YouTuber-i është hapur për incidentin. Në videon e tij të 29 shkurtit, ai foli se si situata e kishte ndikuar mentalisht.
“Para pak muajsh, na vodhën shtëpinë. Askush nuk ishte brenda kur ndodhi kjo, por ishte e habitshme ta zbuloje.”Filloi ai.
PewDiePie tha se sado që shumica e njerëzve ishin suportues pas vjedhjes, kishte disa që e kishin festuar incidentin. “Disa njerëz në internet e morën lajmin si një mundësi për të festuar, duke menduar se meqë kam pasuri, është thjesht një problem i vogël.”
Suedezi më tej zbuloi se atij nuk i kishin vjedhur asgjë: “Një tjetër ironi është se në fakt asgjë personale nuk mu vodh. Dy sendet e mia më të çmuara: kompjuteri dhe kamera, ishin aty. Fatkeqësisht çdo gjë që morën ishte e gruas sime.”
Më tej ai vijoi të shpjegonte se duke lexuar filozofin grek Diogenes, ka mundur ta kapërcejë më mirë situatën që ndodhi, duke e ndihmuar që të mos interesohet më në gjërat materiale.