Ninja akuzohet për toksicitetin e fansave të tij

Tyler ‘Ninja‘ Blevins, ish pro i Halo që u kthye në streamer të Twitch, ka reaguar në një seri mesazhesh në Twitter. Në to flitej për ndjekësit toksikë të tij që dërgonin mesazhe abuzuese ndaj femrave.

Ninja ka rreth 16.7 milionë ndjekës në Twitch dhe është një nga figurat më të njohura në botë kur vjen puna te streaming dhe te videolojërat. Gjithsesi me një bazë kaq të madhe ndjekësish vijnë edhe ata që përhapin negativitet dhe sulmojnë anëtarët e tjerë të komunitetit.

Sado që këta të fundit janë në minoritet, ata e vënë Ninja në pozitë të vështirë, mbi të gjitha kur tërhiqet zvarrë në argumenta për sjelljen që tregojnë ata.

Këto probleme u vunë në dukje nga Michele Morrow, një prezantuese. Në 12 shkurt ajo shkruajti në Twitter se fansat e Ninja e sulmojnë atë, pasi para ditëve ajo shkruajti se fakti që ai nuk luan me femra po i dëmton ato. Më poshtë ajo kishte shtuar disa imazhe ku tregonte mesazhe toksike dhe abuzive. Komentet gjithashtu sulmojnë prezantuesen për kritikën që ajo i bëri Ninja.

Blevins fillimisht u përgjigj në tonalitet ndëshkues kundrejt fansave të tij, duke thënë se ata nuk janë fansa të vërtetë nëse po sulmojnë njerëz.

Gjërat nuk u mbyllën këtu me Morrow që i ktheu përgjigje Ninja, duke i thënë se fansat e tij i kishin thënë “të vriste veten.” Teksa shumë njerëz u simpatizuan me të, të tjerë thanë se Ninja nuk mund të mbajë përgjegjësi për 7 milionë ndjekësit e tij.

Pas një komenti nga Morrow ku tha se kurrë nuk kishte sugjeruar se Ninja është përgjegjës për të, Ninja ja ktheu duke shkruajtur: “Por ti vazhdon ta implikosh këtë përmes mesazheve të shumta ku tregon njerëzit që janë treguar toksikë me ty.”

Morrow më tej i tha Ninja që “të vinte një shembull më të mirë”. Ajo gjithashtu argumentoi mbi qëndrimin e Ninja, se e gjithë baza e argumentit ishte në një “artikull të keq”, duke cituar intervistën që ai kishte bërë me New York Times.