Ish-kapiteni Rio Ferdinand flet për rolin e gaming në ekipin e tij
Ish-kapiteni Rio Ferdinand flet për rolin e gaming në ekipin e tij
Manchester United ishte një prej ekipeve më të mira në Europë dhe fitoi çdo titull gjatë kohës kur Rio Ferdinand ishte një lojtar. Mbrojtësi flet për këto në një intervistë dhe vlerëson punën e palodhur, talentin dhe videolojërat që sollën suksesin dhe fitoret.
“Mënyra si njerëzit luajnë në lojëra shfaqet edhe në futboll,” – tha ish-mbrojtësi anglez në një intervistë. Luajtja e lojërave si SOCOM (një shooter taktik) dhe FIFA ndihmoi që ekipi të ishte më i bashkuar dhe ishte një faktor kyç në një prej periudhave më të mira të Manchester United. Ai madje inkurajon që edhe kombëtarja angleze të bëjë të njëjtën gjë.
Rio Ferdinand është pjesë e një fushate të re, Get Smart About P.L.A.Y, e cila ka si qëllim t’i përfshijë prindërit më shumë në botën e fëmijëve të tyre kur luajnë. “Nuk e dija që mund të vendosje orare dhe të njoftoheshe kur ata blejnë gjëra,” – tha ai. “Mendoj se prindërit duhet të pranojnë që gaming do të jetë për një kohë të gjatë një pjesë e rëndësishme e jetës së fëmijëve të tyre, prandaj ata nuk duhet të mbeten mbrapa.”
Ferdinand gjithashtu flet edhe për videolojërat në shtëpinë e tij, duke thënë se edhe pse karriera e tij në futboll ka mbaruar, ai ende luan rregullisht FIFA me fëmijët e tij. “Nuk i lë asnjëherë vetë që të fitojnë,” – thotë ish-lojtari.
Ai gjithashtu thotë se në kohën që ishte futbollist ishte gjithmonë fitues i kampionateve që bëheshin brenda ekipit në FIFA dhe se tiparet e personalitetit të një personi shfaqeshin shpesh në videolojëra. “Nëse ti kërkoje ndihmë në FPS, disa lojtarë kurrë nuk vinin dhe ata ishin thuajse gjithmonë sulmues.”
Në fund të intervistës, ai gjithashtu kërkon me shaka që dikush të rrisi pasimet dhe shpejtësinë e tij në FIFA.