Anime e reja të cilat do të dalin këtë vjeshtë dhe që duhet t’i shikoni
Anime e reja të cilat do të dalin këtë vjeshtë dhe që duhet t’i shikoni
Ndryshe nga sezonet e tjera, vjeshta kësaj here sjell shumë anime të cilat ndoshta nuk i kemi dëgjuar më përpara por nga të cilat nuk do të zhgënjehemi. Anime të cilat duhet të ndiqni gjatë kësaj vjeshte janë:
Burn The Witch
Historikisht, 72% e të gjitha vdekjeve në Londër janë të shkaktuara nga dragonjtë, qenie fantastike që janë të padukshme për shumicën e njerëzve. Edhe pse për shumë persona kjo është diçka e panjohur, disa persona kanë vendosur të merrem me këtë problem. Vetëm personat të cilët jetojnë në një pjesë sekrete të Londrës mund t’i shohin. Dhe vetëm disa prej tyre janë të kualifikuar për të patur kontakt me ta. Historia flet për dyshen e magjistareve Noel Niihashi dhe Niiny Spangcole. Ato janë agjente të Wing Bind që është një organizatë e cila merret me menaxhimin e dragonjve. Puna e tyre është të mbrojnë dhe të menaxhojnë dragonjtë e Londrën në mënyrë që të mbrojnë njerëzit e saj. Filmi është i ndarë në tre pjesë dhe mund ta shikoni në disa prej platformave streaming të anime.
Demon Slayer: Infinity Train
Pas përballjes me demonët dhe në kërkim të përgjigjeve, Tanjirou Kamado dhe shokët e tij nga Demon Slayer Corps do të bashkohen me Kyoujurou Rengoku, Flame Hashira, për të hetuar disa mistere të ndodhura brenda një treni. Në ketë tren ndodhet Enmu, një nga Twelve Kizuki, për të cilin dimë shumë pak dhe që ka përgatitur shumë kurthe. Me të në bord, shumë sfida e presin Tanjirou dhe miqtë e tij. Filmi do të dalë në kinema në 16 tetor por fatkeqësisht do të na duhet të presim më shumë për ta parë në platformat e ndryshme që transmetojnë anime.
Ikebukuro West Gate Park
Ikebukuro është parajsa e bandave të dhunshme Yakuza të cilat përballen shpesh me njëra-tjetrën. Historia flet për Makoto Majina i cili jeton gjithashtu në Ikebukuro dhe që gjithmonë përpiqet të zbus përplasjet ndërmjet bandave në mënyrë që të mbrojë miqtë e tij të dashur. Por kur ai humb një prej miqve të tij për shkak të dhunës, do të arrijë ai të qetësojë marrëdhëniet apo do të zhytet në botën e dhunës dhe krimit? Anime do të nis transmetimin më 6 tetor.
Akudama Drive
Historia flet për një luftë të shkaktuar në Japoni shumë kohë më përpara që shtyu Kantou kundër Kansai dhe ndau shtetin në dy pjesë. Kansai tashmë është nën varësinë e Kantou por policia dhe qeveria kanë filluar të humbin kontrollin e Kansai nga disa kriminelë të quajtur Akudama. Kjo anime vjen nga e njëjta studio që ka krijuar Naruto, Naruto Shippuuden dhe Black Clover. Transmetimi nis më 8 tetor.
Noblesse
Anime flet për Raizel ose siç njihet ndryshe Rai i cili zgjohet nga gjumi i tij 820 vjeçar. Ai mban titullin special të Noblesse sepse është një Noble gjakpastër dhe ka për detyrë të mbrojë Noble e tjerë. Në mënyrë që ta mbroj Rai dhe t’i mësojë atij më shumë rreth botës, shërbëtori i tij Frankestein e fut atë në Ye-Ran High School. Por gjithsesi një organizatë e fshehtë e quajtur Union ka për qëllim të kontrollojë botën. Kjo organizatë dërgon njerëz të modifikuar për të mundur Rai, gjë që e detyron atë të përdor fuqitë e tij për të mbrojtur miqtë e tij. Transmetimi nis më 8 tetor.
When They Cry (Remake)
Ngjarjet zhvillohen në fshatin e vogël të Hinamizawa gjatë vitit 1983 ku Keiichi Maebara sapo është transferuar në shtëpinë e tij të re. Menjëherë pas ardhjes së tij ai krijon miqësi me Rena Ryuuguu, Rika Furude, Mion Sonozakim dhe Satoko Houjou. Rastësisht ai zbulon një legjendë urbane që thotë se gjatë festivalit i cili po afron së shpejti ndodhin vrasje të ndryshme. I vendosur për të zbuluar autorin mbrapa këtyre ngjarjeve dhe festivalit ai zbulon shumë sekrete të errëta të këtij komuniteti të vogël. Anime është një remake i versionit të vitit 2006 dhe ka nisur transmetimin më 1 tetor dhe mund të ndiqni në platformat e ndryshme streaming të anime.
Jujutsu Kaisen
Në një botë ku demonët ushqehen me njerëzit, pjesë të trupit të demonit më të fuqishëm Ryoumen Sukuna janë humbur dhe shpërndarë kudo në botë. Kushdo demon që konsumon një prej pjesëve të tij, arrin të fitojë fuqi me të cilat ai mund të shkatërrojë botën. Fatmirësisht, pjesëtarët e një shkolle misterioze, ia dalin të mbrojnë njerëzit nga këto krijesa. Yuuji Itadori është një gjimnazist i cili viziton shpesh gjyshin e tij të sëmurë dhe ka fuqi fizike ndryshe nga të tjerët. Një ditë ai me miqtë e tij vendosin të hapin një objekt i cili mund të sjell terror nëse hapet. Anime nisi më datën 3 tetor dhe po transmetohet në shërbimet streaming të anime.