Detaje të reja janë zbuluar për episodet e ardhshme të Attack on Titan

Së fundmi disa detaje rreth Attack on Titan janë zbuluar dhe disa prej tyre mund të mos t’iu pëlqejnë

Attack on Titan më në fund solli episodin e parë të sezonit të katër dhe të fundit gjatë të dielës së kaluar dhe mund të themi që pati një numër të lartë shikueshmërie. Disa detaje të reja janë zbuluar rreth episodeve të reja dhe një prej tyre mund të mos iu pëlqejë.

Shumë prej jush që keni ndjekur episodin e parë jeni kurioz se çfarë do të sjellë episodi i dytë i serisë anime dhe së fundmi titujt e disa prej episodeve janë zbuluar. Episodi 61 do të quhet “Midnight Train”, episodi 62 do të quhet “The Door of Hope” dhe episodi 63 do të quhet “From One Hand to Another” sipas një postimi në Twitter nga @YonkouProd.

Gjithashtu në ketë postim është përmendur një pushim gjatë datës 3 janar të vitit të ardhshëm. Kjo do të thotë që më datën 3 janar nuk do të ketë një episod të ri të Attack on Titan duke i dhënë mundësi stafit që të marrë disa ditë pushime për shkak të festave të fundvitit. Mund të themi që ky lajm do të mërzisë një pjesë të madhe të fansave të anime.

Një detaj tjetër që kemi zbuluar është se deri më tani janë porositur 16 episode, një numër i cili është me të vërtetë i ulët. Sezoni i katër supozohet të përmbledhë afërsisht 45 kapituj të serisë manga dhe nuk besojmë se 16 episode do të jenë të mjaftueshme. Kjo na lë të besojmë se njoftime për prodhimin e episodeve të reja do të vijnë në të ardhmen.

Episodi i parë na njohu më së shumti me shumë fytyra të reja dhe ndoshta shumë prej jush nuk e keni parë akoma personazhin e tyre të preferuar. Gjithashtu mos harroni t’i hidhni një sy momenteve që duhet të mbani mend nga sezonet e kaluara ose website ku mund ta ndiqni.